ߛߣߊ߬ߓߊ߫ ߛߌ߬ߛߋ߫߸ ߞߊ߬ߙߊ߲߬ߠߊ߬ߘߋ߲ ߠߋ߬ ߦߴߊ߬ ߘߌ߫ ߞߊ߲ߞߊ߲߫ ߖߊ߯ߓߘߊ߫ ߖ߭ߎ߳ߟߌߛ ߢߙߋߙߋ߫ ߟߊ߫߸ ߊ߲߬ߜ߭ߌߟߋ ߓߏߟߏ߲ߝߘߊ ߛߊ߲߬ ߝߟߐ ߟߊ߫߸ ߏ߬ ߟߋ ߕߏߣߴߊ߬ ߘߐ߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߅ ߞߏ߲ߞߏߘߓߌ ߕߋ߬ߟߋ߫ ߉، ߏ߬ ߞߍ߫ ߘߊ߫ ߞߵߊ߬ ߥߊߕߐߟߊ ߟߋ߬ ߕߏ߫ ߟߎ ߡߊ߬߸ ߘߊ߬ߟߊ ߺ ߟߊ߫߸ ߦߋ߲߬ ߡߍ߲ ߦߋ߫ ߞߊ߬ߙߌ߬ߝߊ߬ߡߘߎ߬ߦߊ߫ ߡߙߊ߬ߘߊ߬ߘߎ߯ߟߊ ߘߐ߫߸ ߞߊ߲ߞߊ߲߫ ߡߙߊ߬ߓߊ߰ߘߊ ߞߣߐ߫.
ߛߌߟߊߓߐߛߐ߯ߣߊ߫ ߟߊ߫ ߟߌ߬ߤߟߊ߬ ߟߊߘߍ߬ߣߍ߲߫ ߞߎ߲߬ߝߟߐ ߟߎ߬ ߘߐ߫߸ ߘߋ߲ߡߛߏ ߣߌ߲߬ ߛߌ߬ߞߛߊߓߌ ߦߋ߫ ߛߊ߲߬ ߁߈ ߠߋ߬ ߘߐ߫߸ ߊ߬ ߞߊ߬ ߖߍ߰ߝߙߍ ߞߍ߫ ߛߊߙߏ߲߬ ߠߋ߬ ߝߙߊߣߊ߫ ߛߏ ߞߣߐ߫߸ ߊ߬ ߣߊ߬ ߘߊ߫ ߞߊ߲ߞߊ߲߫ ߊ߬ ߟߊ߫ ߞߊ߬ߙߊ߲ ߛߊ߲ߘߐߕߊ ߟߋ߬ ߞߍ߫ ߞߊ߲ߡߊ߬ ߢߌ߬ߣߊ߲߬، ߓߌ߬ߟߊ߬ߒ߬ߘߐ߬ߖߎ߮ ߣߌ߲߬ ߞߍ߫ ߘߊ߫ ߓߌ߬ ߁߇ߙߋ߲ ߝߊ߲߬ߝߍ߬ߟߊ ߟߋ߬ ߘߐ߫߸ ߞߵߊ߬߬ ߛߐ߬ߘߐ߲߬ ߊ߬ ߦߋ߫ ߥߊߟߌߥߊߟߌ ߞߐߟߊ߫߸ ߊ߬ ߓߕߐ ߖߊ߯ߓߘߊ ߟߊ߫ ߞߊ߬ ߕߊ߯ ߟߎ ߡߊ߬ ߘߊ߬ߟߊ ߺ ߟߊ߫.
ߓߌ߬ߟߊ߬ߒ߬ߘߐ߬ߖߎ߮ ߣߌ߲߬ ߕߎ߬ߙߎ ߞߍ߫ ߘߊ߫ ߔߏߔߏ ߣߌ߫ ߞߊ߲ߓߋ߲߫ ߘߊ߲߬ߞߊ߬ߞߎߟߎ߲ ߠߊ߫ ߞߍߢߐ߲߯ߘߐ ߟߋ߬ ߘߌ߫߸ ߡߍ߲ ߖߎ߯ߦߊ߫ ߘߊ߫ ߞߏߛߓߍ߫، ߛߊ߬ߓߊ߰ߕߐ ߕߘߍ߬ ߔߏߔߏ߫ ߓߏߙߌߟߊ ߡߍ߲ ߞߐߟߊ߫߸ ߏ߬ ߖߐߞߌ߫ ߞߏߖߎ߮ ߟߋ߬ ߞߍ߫ ߘߴߊ߬ ߛߋ߲߭ ߠߊ߫، ߞߊ߲ߓߋ߲߫ ߓߏߙߌߟߊ ߛߊ߫߸ ߏ߬ ߡߊ߫ ߛߋ߫ ߡߊߛߐ߬ߘߐ߲߬ ߠߴߊ߲ ߓߟߏ߫، ߓߊߏ߬߸ ߊ߲ ߠߊ߫ ߟߌ߬ߤߟߊ߫ ߞߎ߲߬ߝߟߐ ߟߎ߬ ߦߴߊ߬ ߦߌ߬ߘߊ߬ ߟߊ߫ ߓߌ߬ߟߊ߬ߒ߬ߘߐ߬ߖߎ߮ ߞߍ߫ ߦߙߐ ߘߐ߫߸ ߞߏ߫ ߊ߬ߟߋ ߞߵߊ߬ ߓߏ߬ߙߌ߫ ߟߋ߬.
ߞߊ߲ߞߊ߲߫ ߘߊ߲ߘߊߛߏߓߊ ߞߟߊߡߊ߲ߘߊ ߟߊߟߐ߲ߠߌ߲ ߞߐ߫߸ ߏ߬ ߟߎ߬ ߣߌ߫ ߕߐ߲ߓߟߏߡߊ ߟߎ߬ ߓߍ߯ ߕߘߍ߬ ߞߣߍ ߞߊ߲߬ ߦߋ߲߬، ߞߊ߲ߞߊ߲߫ ߘߊ߲ߘߊߛߏߓߊ ߛߋ߲߬ߘߐ߬ߞߎߟߎ߲ ߘߏ߫ ߟߎ߫ ߕߊ߯ ߘߊ߫ ߞߏߕߐ ߕߊ߬ ߞߊ߲ߡߊ߬߸ ߊ߬ ߣߌ߫ ߥߊߟߌߥߊߟߌ߫ ߓߏߙߌߟߊ ߞߊ߬ ߥߴߊ߬ߟߎ߬ ߘߌ߫ ߘߊ߲ߘߊߛߏ ߟߊ߫ ߞߟߊߡߊ߲ߝߊߘߌ ߘߐ߫.
ߊ߬ߟߎ߬ ߛߋ ߞߊ߲ߞߊ߲߫ ߕߌ߲߬ߞߎߘߎ߲ ߘߊ߲ߘߊߛߏߓߊ ߟߊ߫߸ ߛߣߊ߬ߓߊ߫ ߛߌ߬ߛߋ߫ ߡߊ߫ ߛߴߊ߬ ߟߊ߫ ߖߐߞߟߌ ߞߘߐ߫߸ ߏ߬ ߕߊ ߟߊߓߊ߲߫ ߘߊ߫ ߛߊ߬ߦߊ ߟߋ߬ ߡߊ߬، ߊ߬ ߛߊ߬ ߞߏ ߟߤߊߕߍߦߊ߫ ߘߊ߫ ߘߊ߲ߘߊߟߌߟߊ ߓߟߏ߫ ߛߌߟߊߓߐߛߐ߯ߣߊ߫ ߝߐ߰ߓߍ߬ߦߊ߬ߟߊ ߘߏ߫ ߢߣߊ߫ ߟߋ߬ ߘߊ߲ߘߊߛߏ ߟߊ߫ ߦߋ߲߬.
ߛߣߊ߬ߓߊ߫ ߕߘߍ߬ ߝߙߊߣߞߊ ߟߎ߬ ߣߌ߫ ߝߙߊߣߊ߫ ߞߊ߬ߙߊ߲߬ߘߋ߲ ߠߎ߬ ߣߴߊ߬ ߞߊ߬ߙߊ߲߬ߠߊ߬ߘߋ߲ ߠߎ߬ ߣߴߊ߬ߟߎ߫ ߘߍ߬ߢߐ߲߮ ߠߎ߬ ߟߊ߫ ߘߍ߭ ߛߌ߲߬ߝߏ߲ ߠߋ߬ ߘߌ߫ (ߊߖ߭ߋߙߊߝ)، ߊ߬ ߟߊ߫ ߛߊ߬ߦߊ ߣߌ߲߬ ߓߙߊ߬ߣߴߊ߬ ߟߊ߫ ߡߐ߱ ߟߎ߬ ߘߐ߫ ߞߏߛߓߍ߫߸ ߊ߬ ߓߘߴߊ߬ߟߎ߫ ߓߌ߬ߟߊ߬ ߢߊߖߌ ߣߌ߫ ߛߎ߬ߣߎ߲ ߕߍߡߊ߬߸ ߞߎߡߊߕߴߊ߬ ߞߊ߬ߙߊ߲߬ߠߊ߬ߘߋ߲߬ߢߐ߲߮ ߠߎ߬ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߛߌߟߊߓߐߛߐ߯ߣߊ߫ ߝߐ߰ߓߍ߬ߦߊ߬ߟߊ
