ߞߊ߬ߦߌ߯ ߓߌ߬ ߞߍ߲ߘߍߟߏ߲ ߣߌ߲߬ ߛߐ߱ߡߊ߬߸ ߂߀߂߅ ߞߏ߲ߞߏߘߓߌ ߕߟߋ߬ ߆ ߡߊ߬߸ ߖߋ߬ߣߌ߲߬ߕߊ߬ ߞߏ߬ߖߊ ߟߋ߬ ߟߊߞߙߐ߬ߛߌ߬ ߘߊ߫ ߞߊ߲ߞߊ߲߫ ߛߏ ߞߣߐ߫، ߖߌߥߎߘߊ߫ ߛߌߦߊߡߊ߲߫ ߘߊ ߣߍ߰ߣߍ߲߫ ߠߋ߬ ߕߘߍ߬߸ ߞߵߊ߬ ߕߊ߬ ߡߏߓߌߟ ߡߊ߬ ߞߊ߬ ߣߊ߬ ߛߍ߲߬ߞߍ߬ߝߙߊ߫߸ ߤߊߟߌ߬ ߟߐ߯ߝߍߓߊ ߘߐ߫، ߏ߬ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߤߊߡߌ߲ ߛߌ߰ ߓߏ߬ߙߌ߬ߝߋ߲߬ߕߌ߮ ߟߎ߬ ߟߊ߫.
ߒ߬ߓߊ߬ ߞߣߐ߬ߜߊ ߏ߬ ߟߋ ߡߊ߬ ߛߊ߫߸ ߖߌߥߎ߫ ߝߙߋߟߊ ߡߍ߲ ߠߎ߬ ߦߋ߫ ߟߐ߯ߝߌ߲ ߘߐ߫߸ ߏ߬ ߟߎ߬ ߝߣߊ߫ ߞߊ߬ ߛߊ߲ߞߊ ߕߊ߬، ߞߊ߬ ߕߊ߬ߡߌ߲߬ ߞߏ ߟߎ߬ ߘߐߜߟߍ߬ߦߊ߬ ߟߊ߫، ߓߊߏ߬߸ ߖߌߥߎ ߡߍ߲ ߦߋ߫ ߝߙߋ߬ ߟߊ߫ ߁߂ ߀߀߀ ߟߊ߫ ߖߌߥߎߘߊ ߟߎ߬ ߟߊ߫߸ ߞߵߊ߬ ߝߙߋ߬ ߁߃ ߀߀߀ ߟߊ߫ ߟߐ߯ߝߌ߲ ߘߐ߫ ߞߘߐ߬ߡߊ߲߬߸ ߏ߬ ߟߋ ߦߟߍ߬ ߘߊ߫ ߓߌ߬ ߞߊ߬ ߛߋ߫ ߁߅ ߀߀߀ ߘߐ߫.
ߏ߬ ߞߍ߸ ߖߌ߬ߣߍ߬ ߞߓߊߕߟߎ߫ ߞߏߟߊߘߍ߫ ߝߊ߬ߛߏ߬ߟߊ߬ߞߊ (ߛߏߣߊߔ) ߞߵߊ߬ ߦߌ߬ߘߊ߬ ߞߏ߫ ߖߌߥߎ߫ ߘߛߍ ߟߋ߬߸ ߒ߬ߞߊ߬ ߞߏߖߊ߫ ߕߍ߫ ߝߋߎ߫، ߏ߬ߟ ߋ ߘߐ߫߸ ߞߵߊ߬ ߟߊߥߟߌ߬ ߞߏ ߟߎ߬ ߘߐߞߣߍ ߡߊ߬߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߟߊ߫ ߥߟߋߟߌ ߛߋ߫ ߘߊ߫ ߛߟߊߕߌ߯ ߡߊ߬ߡߊ߬ߘߌ߬ ߜߍߡߊ߲߫ ߞߊ߬ߓߊ ߡߊ߬߸ ߊ߬ߟߋ ߡߍ߲ ߦߋ߫ ߛߏߣߊߔ ߜߋ߬ߟߎ߲߬ߠߌ߲߬ߠߊ߫ ߕߌ߲߬ߞߎ߬ߘߎ߲߬ߠߊ߬ߞߊ ߘߌ߫ ߞߊ߲ߞߊ߲߫ ߞߣߐ߫، ߊ߬ߟߋ ߞߵߊ߬ ߦߌ߬ߘߊ߬ ߞߏ߫ ߞߏߖߊ߫ ߕߍ߫ ߡߎ߬ߡߍ߫߸ ߞߏ߫ ߛߎ߲ߞߊߙߏ߫ ߛߊߟߌ ߖߌߥߎ߫ ߛߊ߲ ߛߊ߲ߞߊߥߟߌ ߟߋ߬ ߣߐ߬ ߖߌߥߎ߫ ߘߛߍ ߟߊߘߏ߲߬ ߠߊ߫.
<<ߖߌߥߎ߫ ߞߏߖߊ߫ ߕߍ߫ ߞߊ߲ߞߊ߲߫، ߛߎ߲ߞߊߙߏ ߟߊ߫߸ ߛߊ߲߬ߠߌ߲ ߛߎߡߊ߲ߡߊ߲߫ ߕߘߍ߬߸ ߏ߬ ߟߋ ߞߵߊ߲ ߟߐ߬ ߡߊߞߟߌߕߊ ߟߊߘߐ߯ߦߊ߫ ߟߊ߫، ߓߊ߬ߙߌ߬ ߛߊߟߌ ߝߍ߬߸ ߊ߲ ߕߎ߲߬ ߞߊ߬ ߡߍ߲ ߖߊ߬ߕߋ߫ ߕߋ߬ߟߋ߫ ߛߊ߬ߓߊ߫ ߝߋ߬ߙߋ ߘߌ߫߸ ߏ߬ ߟߋ ߛߊ߲߬ ߘߊ߫ ߕߟߋ߬ ߞߋߟߋ߲ ߞߘߐ߫، ߏ߬ ߟߋ ߣߊ߬ ߘߊ߫ ߖߌߥߎ ߟߎ߬ ߓߊ߲߫ ߥߊ߯ߕߌߣߍ߲߫ ߞߘߐ߫߸ ߓߊ߬ߙߌ߬ ߝߊ߯ߞߊ߲ߓߋ߲ ߠߎ߬ ߓߘߊ߫ ߘߏ߲߭ ߘߊߡߌ߬ߣߊ߬.>> ߊ߬ߟߋ ߟߋ߬ ߞߵߏ߬ ߝߐ߫.
ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߝߣߊ߫ ߔߊߞߌߛߊ߫߸ ߞߏ߫ ߖߌߥߎߘߊ ߘߏ߫ ߟߎ߫ ߖߍ߬ߘߍ ߓߍ߫߸ ߦߏ߫ ߛߌ߯ߙߌ߲߫ ߞߊߙߋߝߎߙ߸ ߓߐ߬ߘߏ߫ ߔߋ߬ߕߌ ߔߑߟߊ߬ߕߏ߸ ߛߍ߲߬ߞߍ߬ߝߙߊ߫߸ ߊ߬ ߣߌ߫ ߦߍߛ ߟߊ߫ ߖߌߥߎߘߊ ߟߎ߬߸ ߏ߬ ߟߎ߬ ߓߍ߯ ߝߊ߯ߞߊ߲ߓߋ߲ ߠߎ߬ ߓߘߊ߫ ߘߏ߲߬ ߞߵߊ߬ߟߎ߬ ߛߐ߫ ߖߌߥߎ ߟߊ߫.
<<ߣߌ߫ ߖߌߥߎ߫ ߞߏߖߊ ߟߋ߬ ߕߘߍ߬߸ ߊ߲ ߕߎ߲߬ ߘߌ߫ ߕߐ߲ߓߟߏߡߊ ߟߎ߬ ߟߊߖߌ߰، ߓߊ߬ߙߌ߬ ߣߴߌ ߞߵߊ߬ ߦߋ߫ ߊ߲ ߡߴߏ߬ ߞߍ߫߸ ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߊ߬ ߞߏ ߕߍ߫ ߞߏߓߊ߫ ߘߌ߫.>>
ߡߍ߲ ߓߍ߲߬ߕߐ߫ ߖߌߥߎ ߛߐ߲߬ߞߐ߬ ߟߊ߬ߜߟߍߦߊ ߡߊ߬ ߟߐ߯ߝߌ߲ ߘߐ߫ ߛߊ߫߸ ߛߏߣߊߔ ߞߐߦߌߘߊ ߞߵߊ߬ ߦߌ߬ߘߊ߬ ߞߏ߫ ߕߎ߬ߢߊ߬ ߜߍ ߦߋ߫ ߡߍ߲ ߘߌ߫߸ ߊ߬ߟߎ ߡߊ߫ ߡߞߊ߬ߛߟߌ߬ ߝߏߦߌ߬ ߛߐ߬ߘߐ߲߬ ߡߎߣߎ߲߬߸ ߞߵߊ߬ ߓߍ߲߬ ߛߐ߲߬ߞߐ߬ ߟߊ߬ߦߟߍ ߣߌ߲߬ ߡߊ߬߸ ߣߴߊ߬ߟߎ߬ ߘߌ߫ ߛߋ߫ ߢߊߢߌߣߌ߲ߠߌ߲߫ ߠߊߥߟߌ߬ ߟߴߏ߬ ߞߏ ߘߐ߫.
<<ߞߎ߲߬ߠߊ߬ߛߌ߮ ߞߊ߬ ߛߐ߲߬ߞߐ ߡߍ߲ ߝߐ߫ ߖߌߥߎ ߕߏ߲ߜߊ ߟߊ߫ ߖߌߥߎߘߊ ߟߎ߬ ߟߊ߫߸ ߏ߬ ߟߋ ߁߂ ߀߀߀ ߘߌ߫، ߝߙߋ߬ߞߍ߬ߟߊ ߡߍ߲ ߠߎ߬ ߦߋ߫ ߛߏ ߢߊߝߍ߬ ߛߊ߫߸ ߏ߬ ߟߎ߬ ߦߋ߫ ߅߀߀ ߣߌ߫ ߁߀߀߀ ߠߎ߬ ߟߋ߬ ߢߌߣߌ߲߫ ߠߴߊ߬ ߞߊ߲߬، ߣߌ߫ ߡߍ߲ ߦߟߍ߬ ߘߴߏ߬ ߛߊ߲ߘߐ߫ ߛߊ߫߸ ߏ߬ ߦߴߊ߬ ߕߊ߫ ߞߏ߫ ߜߘߍ߫ ߟߋ߬ ߘߌ߫، ߊ߬ ߞߏ߬ߣߌ߲ ߤߊ߲߯ ߕߋ߲߬߸ ߊ߲ߠߎ߬ ߡߊ߫ ߡߞߊ߬ߛߌ߬ߟߌ߫ ߛߐ߬ߘߐ߲߬ ߡߎߣߎ߲߬ ߞߵߊ߬ ߓߍ߲߬ ߛߐ߲߬ߞߐ߬ ߟߊ߬ߦߟߍ ߏ߬ ߡߊ߬.>> ߛߟߊߕߌ߯ ߞߊ߬ߓߊ ߟߋ߬ ߞߊ߲߫ ߕߋ߲߬.
ߊ߬ ߞߊ߬ ߞߊ߲ߞߊ߲ߞߊ ߟߎ߬ ߞߟߌ߫ ߡߎ߬ߢߎ߲ ߠߋ߬ ߡߊ߬، ߞߵߊ߬ ߦߌ߬ߘߊ߬ ߞߏ߫ ߖߌߥߎ ߦߋ߫ ߣߊ߭ ߞߊ߲߬߸ ߘߏ߫ ߟߎ߫ ߓߘߊ߫ ߛߋ߫ ߦߊ߲߬، ߏ߬ ߘߐ߸ ߞߏ߫ ߕߎ߬ߡߊ߬ߙߋ߲߬ ߞߋߟߋ߲ ߣߌ߫ ߕߟߋ߬ ߞߋߟߋ߲ ߜߟߍ߬ߦߊ ߞߊߣߊ߬ ߡߐ߰ ߟߐ߬ ߖߌߥߎ ߛߊ߲߬ ߠߊ߫ ߛߐ߲߬ߞߐ߬ ߜߍߟߍ߲ ߠߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߆߂߀ ߉߁ ߇߁ ߀߄
