ߓߐ߬ߟߐ߲߬ߞߊ߬ ߊߘߊߡߊ߬ ߞߏ߬ߣߊ߬ߕߍ߬ ߡߍ߲ ߝߊ߰ ߘߊ߫ ߘߓߌߘߊ ߟߊ߫ ߂߀߂߅ ߕߙߊߓߊ ߕߋ߬ߟߋ߫ ߂߀ ߡߊ߬ ߓߊ߬ߣߊ߲߬ߞߘߐ߬ߘߊ ߞߌ߲߬ߘߊ ߟߊ߫߸ ߏ߬ ߟߊ߫ ߞߕߌ ߓߘߊ߫ ߕߍ߰ ߛߍߣߍ߲߬ ߝߋߎ߫، ߓߌ߬ ߞߏ߲ߞߏߘߓߌ ߕߟߋ߬ ߈ ߣߌ߲߬ ߡߊ߬߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߵߊ߬ ߟߊ߫ ߞߕߌߕߍ߯ ߞߊ߲ ߝߐ߫߸ ߓߊ߲߬ߞߊߟߌ߬ ߕߙߊߥߟߋ߫ ߦߋ߫ ߘߊ߫ ߛߐ߲߬ߡߊ߬ ߘߌ߫ ߡߐ߰ߝߊ߰ ߞߏ ߘߐ߫߸ ߊ߬ߟߎ߫ ߞߵߊ߬ ߖߊ߲ߞߌ߲߫ ߞߎ߲߬ߞߏ߬ߓߊ߬ߕߐ߬ߦߊ ߖߊ߲߬ߞߟߌ߬ ߢߊ ߡߊ߬ ߘߎߡߊߟߌ߫ ߓߟߏ ߡߊ߬߸ (ߥߛߎߖߌ߲߫ ߘߎߡߊߣߍ߲ ߞߊ߬ߣߌ߲߬)، ߞߊ߬ ߓߊ߲߫ ߞߵߊ߬ ߝߐ߫ ߞߏ߫ ߊ߬ ߕߴߛߋ߫ ߡߊߞߕߏ߫ ߟߊ߫ ߥߟߊ߫ ߞߵߊ߬ ߓߌ߬ߟߊ߬ ߢߊ߫ ߜߘߍ߫ ߡߊ߬߸ ߝߏ߫ ߛߊ߲߬ ߃߀ ߓߊ߯ ߘߝߊ߫. ߏ߬ ߓߍ߯ ߞߐ߫߸ ߞߕߌߘߊ ߞߵߊ߬ ߖߊ߲ߞߌ߲߫ ߖߌ߬ߣߍ߬ ߕߊߡߊ߲ ߥߟߎ߬ߡߊ߫ ߛߊ߬ߓߊ߫ ߛߊ߬ߙߊ ߟߊ߫߸ ߞߵߏ߬ ߘߌ߫ ߝߊ߰ߓߊ߰ߕߐ߫ ߊߘߊߡߊ߬ ߞߏ߬ߣߊ߬ߕߍ߫ ߗߍߕߊߓߊ߮ ߟߎ߫ ߡߊ߬.
ߞߕߌ ߣߌ߲߬ ߘߊߡߌ߬ߣߊ߬ ߘߊ߫ ߁߀ߙߋ߲ ߝߊ߲߬ߝߍ߬ߟߊ ߟߋ߬ ߘߐ߫، ߊ߬ ߟߊߝߟߐ߫ ߘߊ߫ ߡߊ߬ߝߌ߲߬ߓߊ߰ߕߐ ߟߊ߫ ߛߙߊ߬ߣߎ߲ ߠߋ߬ ߡߊ߬߸ ߏ߬ ߡߍ߲ ߞߵߊ߬ ߟߐ߬ ߊ߬ ߛߐ߲߭ ߠߊ߫ ߞߊ߬ߦߌ߯ ߞߎߡߊ ߘߊߡߌߣߊ ߟߊ߫، ߊ߬ ߟߊ߫ ߞߎߡߊ ߏ߬ ߘߐ߫߸ ߊ߬ ߞߵߊ߬ ߟߌ߬ߤߟߊ ߟߎ߬ ߢߊߝߐ߫߸ ߞߵߊ߬ ߛߐ߬ߘߐ߲߬ ߦߙߐ ߣߴߊ߬ ߡߏߦߌߓߊ߮ ߟߎ߬ ߕߐ߮ ߣߴߊ߬ ߓߊ߯ߙߘߊ ߟߎ߬ ߝߐ߫، ߏ߬ ߟߋ ߞߐ߫߸ ߊ߬ ߞߊ߬ ߘߐ߬ߢߌ߬ߣߌ߲߬ߞߊ߬ߟߌ ߟߎ߬ ߟߊߞߢߐ߬ߡߊ ߘߊߡߌ߬ߣߊ߬߸ ߞߊ߬ ߝߘߊ߫ ߝߘߏ߬ߓߊ߬ ߞߏߕߌ߯ߘߊ ߟߊ߫߸ ߏ߬ ߡߍ߲ ߦߋ߫ ߖߊ߬ߡߊ ߤߊߞߍ ߡߞߊߘߊ߲ ߠߊ߫ ߦߋ߲߬߸ ߊ߬ ߣߌ߫ ߟߊ߬ߝߛߊ߬ߟߌ߬ߟߊ ߟߎ߬߸ ߣߊ߲߬ߒ߬ߕߊ߲߬ ߞߎ߲ߘߊ߫߸ ߊ߬ ߣߌ߫ ߡߊ߬ߞߊ߲߬ߞߊ߲߬ߠߌ߲߬ ߞߎ߲ߘߊ߫.
ߝߘߏ߫߬ߓߊ߬ ߞߏߕߌ߯ߘߊ ߡߍ߲ ߞߐߦߌ߬ߘߊ߬ߣߍ߲߫ ߕߘߍ߬ ߞߕߌߞߊ߲ߘߊ߫ ߡߊߙߎߥߊߣ ߓߊߟߑߘߋ߬ ߓߟߏ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߓߌ߲߬ߓߊ߬ߥߏ߬ ߛߊ߲ߘߐ ߟߋ߬ ߞߊ߫ ߞߊ߲߫ ߞߊ߬ ߟߊ߫ ߗߍ߭ ߣߌ߲߬ ߞߎ߲߬߸ ߣߊߟߌ߬ߡߎ߲߫ ߥߛߎ߫ ߘߎߡߊߣߍ߲ ߣߌ߫ ߛߊ߲߬ ߃߀ ߟߊ߬ߕߊ߲ߞߊ ߘߌ߫، ߞߊ߬ ߓߊ߲߫ ߞߵߊ߬ ߢߌߣߌ߲߫ ߞߕߌߘߊ ߝߍ߬ ߝߣߊ߫߸ ߞߏ߫ ߞߊ߬ ߣߊ߲߬ߕߊ߲߬ ߞߎ߲ߘߊ߫ ߟߊ߫ ߕߣߐ߬ ߡߞߊߣߌ߲ߣߍ߲ ߠߎ߬ ߣߴߊ߬ ߕߌߢߍߟߌ߫ ߣߐ ߟߎ߬ ߘߐߓߍ߲߭ ߛߙߊߕߌ߫ ߝߐߣߍ߲ ߠߎ߬ ߘߊ߲ߞߎ߲߫ ߞߊ߬ ߛߐ߲߬ ߊ߬ ߡߊ߬، ߞߊ߬ ߓߊ߲߫ ߝߣߊ߫߸ ߞߏ߫ ߞߊ߬ ߗߍ߭ ߟߊ߫ ߜߍߓߏ߲ ߖߊ߬ߕߋ߬ߘߊ ߡߌ߬ߘߴߊ߬ ߟߊ߫ ߞߵߊ߬ ߘߌ߫ ߝߊ߰ߓߊ߰ߕߐ ߞߐߙߍ ߡߊ߬߸ ߊ߬ ߣߌ߫ ߡߏ߬ߛߏ ߟߎ߬ ߤߊߞߍ߫ ߡߞߊߣߌ߲߫ ߕߐ߲ ߠߎ߬.
ߣߊ߲߬ߒ߬ߕߊ߲߬ ߞߎ߲ߘߊ߫ ߟߊ߬ߝߛߊ߬ߟߌ߬ߟߊ ߞߊ߬ߙߊ߲߬ߡߐ߰ ߡߏߙߌ߬ ߞߏߣߋ߫ ߞߵߊ߬ ߦߌ߬ߘߊ߬ ߞߏ߫: <<ߓߊ߲߬ߞߊߟߌ߬ ߕߙߊߥߟߋ߫ ߣߌ߲߬ ߦߋ߫ ߡߐ߰ߝߊ߰ߟߊ ߟߋ߬ ߘߌ߫߸ ߡߍ߲ ߛߐ߬ߘߐ߲߬ߣߍ߲߫ ߞߘߊ߬ߜߟߍ߬ߦߊ ߘߌ߫߸ ߓߊ߯ߙߊ߫ ߜߘߍ߫ ߕߴߊ߬ ߟߊ߫ ߏ߬ ߞߐ߫، ߏ߬ ߟߋ ߘߐ߫߸ ߊ߬ ߣߌ߫ ߥߟߎ߬ߡߊ߬ ߥߐ߯ߙߐ߫ ߛߊ߬ߙߊ ߟߋ߬ ߞߊ߫ ߞߊ߲߫، ߏ߬ ߖߍ߬ߘߍ ߡߴߊ߬ ߓߐ߫߸ ߓߊߏ߬ ߡߐ߰ ߛߌ߫ ߕߍ߫ ߛߐ߲߬ ߊ߬ ߣߌ ߘߌ߫ ߟߊ߫ ߥߟߎ߬ߡߊ߫ ߗߍ߬ߡߍ ߞߎ߲߬ߞߘߐ߫ ߞߎߡߊߕߍ߫ ߥߟߎ߬ߡߊ߬ ߆ ߡߊ߬.>>
ߡߊ߬ߞߊ߲߬ߞߊ߲߬ߠߌ߲߬ ߞߎ߲ߘߊ߫ ߟߊ߬ߝߛߊ߬ߟߌ߬ߟߊ ߛߊ߫߸ ߣߊߟߌ߬ߡߎ߲߬ ߞߊ߬ߙߊ߲߬ߡߐ߰ ߌߓߙߊߤߌߡߊ߫ ߞߊߟߌߟ ߞߊ߲ߕߍ߫ ߘߌ߫߸ ߏ߬ ߞߊ߲߫ ߞߏ߫ ߦߊ߬ߝߊ ߞߎߡߊ ߟߊߜߊ߬ߛߌ ߊߘߊߡߊ߬ ߟߊ߫ ߟߊ߬ߝߛߊ߬ߟߌ߬ߟߊ ߓߟߏ߫߸ ߏ߬ ߣߴߏ߬ ߞߊ߫ ߞߊ߲߫، ߓߊ߬ߙߌ߬߸ ߞߏ߫ ߜߘߍ߫ ߕߍ߫ ߦߊ߬ߝߊ ߞߐ߫ ߘߋ߬، ߏ߬ ߘߐ߫߸ ߞߏ߫ ߊ߬ ߟߊ߫ ߟߊ߬ߝߛߊ߬ߕߊ ߕߐ߯ ߘߐ߫߸ ߊ߬ ߦߋ߫ ߦߊ߬ߝߊ ߢߌߣߌ߲߫ ߠߊ߫߸ ߞߊ߬ ߓߊ߲߫ ߞߵߊ߬ ߡߌ߬ߘߴߊ߬ ߟߌ߬ߤߟߊ ߟߊ߫.
ߞߊ߬ ߞߐ߰ ߞߕߌߘߊ ߞߍ ߢߍ߫ ߞߊ߬ ߞߕߌ ߓߊ߲߬ߝߟߍ߬ߟߍ ߟߊߓߐ߫߸ ߓߊ߲߬ߞߊߟߌ߬ ߕߙߊߥߟߋ߫ ߞߊ߬ ߛߙߊ߬ߣߎ߲ ߕߊ߬ ߞߵߊ߬ ߟߊ߫ ߞߎߡߊ߫ ߟߊߓߊ߲ ߠߎ߬ ߝߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߣߡߌߛߊߣߍ߲߫ ߘߍ߬ߜߍ ߟߋ߬ ߕߋ߲߬߸ ߘߊ߲߬ ߕߍ߫ ߡߍ߲ ߠߊ߫، ߏ߬ ߟߋ ߘߐ߫߸ ߞߏ߫ ߊ߬ ߦߋ߫ ߦߊ߬ߝߊ ߕߙߊ߫ ߟߊ߫ ߝߊ߰ߓߊ߰ߕߐ ߟߊ߫ ߡߐ߱ ߟߎ߬ ߝߍ߬߸ ߊ߬ ߣߌ߫ ߞߊ߲ߞߊ߲ߞߊ ߟߎ߬ ߣߌ߫ ߖߡߊ߬ߣߊ ߞߎ߲߬ߠߊ߬ߛߌ߮ ߟߎ߬ ߓߍ߯ ߟߊߘߍ߬ߣߍ߲ ߞߐߘߍ߫، ߊ߬ ߡߊ߫ ߘߊ߲߬ ߏ߬ ߡߊ߬߸ ߊ߬ ߞߎߡߊ߫ ߘߴߊ߬ ߟߊ߫ ߞߍ߲ߘߍߦߊ ߟߌ߬ߤߟߊ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߗߊߥߎ߲ ߠߋ߬ ߊ߬ߟߋ ߞߊ߲߬߸ ߡߍ߲ ߓߘߴߊ߬ ߛߍ߰، ߏ߬ ߟߋ ߘߐ߫߸ ߞߏ߫ <<ߤߊߟߌ߬ ߛߊ߲߬ ߁߀ ߥߟߊ߫ ߁߅ ߟߋ߬ ߓߊ߯ ߟߊ߫ ߒߠߋ ߞߎ߲߬߸ ߒ ߡߊ߫ ߟߴߊ߬ ߟߊ߫ ߣߌ߫ ߒ ߘߌ߫ ߛߴߏ߬ ߞߍ߫ ߟߊ߫ ߏ߬ ߞߐ߫.>> ߞߵߏ߬ ߞߎ߲߭ ߞߍ߫ ߊ߬ ߟߊ߫ ߖߊ߲߬ߞߊߙߏ ߕߊ߬ߣߊ ߟߎ߬ ߟߊߕߏߓߊߟߌߦߊ ߘߌ߫ ߥߛߎ ߟߊ߫ ߦߋ߲߬߸ ߊ߬ ߣߌ߫ ߓߌ߲ߝߊ߯ߟߊ߲߫ ߡߌ߲߬ߣߍ߲ ߞߐߝߟߌ ߘߏ߫ ߟߎ߫ ߦߋ ߘߌ߫ ߊ߬ ߝߊ߬ߘߌ ߡߊ߬ߑ ߊ߬ ߖߍ߬ߘߍ ߟߊ߫ ߝߐߟߌ߫ ߘߐ߫.
ߞߕߌߘߊ ߝߣߊ߫ ߟߊ߫ ߞߎߡߊ ߓߏ߬ߙߌ߬ ߘߊ߫ ߞߕߌߞߊ߲ߘߊ ߟߊ߫ ߞߎߡߊ ߟߋ߬ ߞߊ߲߬ ߝߊߦߌߘߊ߫߸ ߣߴߏ߬ ߦߋ߫ ߓߊ߲߬ߞߊߟߌ߬ ߕߙߊߥߟߋ߫ ߖߊ߲߬ߞߌ߲ ߘߌ߫ ߞߏ߫ ߊ߬ ߛߐ߲߭ ߓߘߊ߫ ߦߴߊ߬ ߘߐ߫߸ ߏ߬ ߘߐ߫ ߊ߬ߟߎ߬ ߓߘߊ߫ ߞߎ߲߬ߞߏ߬ߓߊ߬ߕߐ ߟߎ߬ ߟߊ߫ ߓߌ߲߬ߓߊߥߏ ߟߴߊ߬ ߞߎ߲߬߸ ߣߊߟߌ߬ߡߎ߲߫ ߥߛߎ߫ ߘߎߡߊߣߍ߲ ߘߌ߫، ߞߵߊ߬ ߟߴߊ߬ ߞߊ߲߬ ߘߊ ߕߍ߫ ߓߌ߬ߟߴߊ߬ ߟߊ߫ ߞߏ ߘߐ߫ ߥߟߊ߫ ߞߵߊ߬ ߡߊߞߕߏ߫ ߛߊ߲߬ ߃߀ ߞߎ߲߬ߕߊ߯ ߞߣߐ߫ ߝߋߎ߫، ߊ߬ ߘߏ߲߬ ߘߌ߫ ߖߌ߬ߣߍ߬ ߕߊߡߊ߲ ߥߟߎ߬ߡߊ߫ ߛߊ߬ߓߊ߫ ߛߊ߬ߙߊ߫ ߛߊ߬ߓߊ߰ߕߐ߬߬ ߊߘߊߡߊ߬ ߞߏ߬ߣߊ߬ߕߍ߫ ߞߐߙߍ ߦߋ߫.
ߞߵߊ߬ ߓߍ߲߬ ߛߊ߬ߙߌ߬ߦߊ ߝߐ߫ ߞߊ߲ ߠߎ߬ ߡߊ߬߸ ߕߟߋ߬ ߁߅ ߘߌ߫ ߘߊ߫ ߝߊ߲߭ ߝߌ߬ߟߊ ߓߍ߯ ߡߊ߬߸ ߞߏ߫ ߊ߬ߟߎ߬ ߘߌ߫ ߛߋ߫ ߞߕߌ߫ ߡߛߊߦߌ߲ ߠߊߢߌߣߌ߲߫ ߠߊ߫.
ߞߵߊߟߎ߫ ߦߟߌߓߌ߬ߟߊ߬ ߓߊߘߋ߲ ߠߎ߬߸ ߓߊ߲߬ߞߊߟߌ߬ ߕߙߊߥߟߋ߫ ߣߌ߫ ߊߘߊߡߊ߬ ߕߙߊߥߟߋ߫ ߞߊ߬ ߞߏߟߊߘߍ߬ ߞߊ߬ߦߌ߯ ߛߊ߲߭ ߕߊ߬ߡߌ߲߬ߣߍ߲ ߛߎ߲ߞߊߙߏ ߟߋ߬ ߝߍ߬߸ ߏ߬ ߡߍ߲ ߞߎ߲߬ߢߐ߲߮ ߕߘߍ߬ ߛߎ߲ߞߊߙߏ߫ ߕߊ߬ߡߌ߲߬ ߛߊ߲߬ ߞߎߘߊ ߣߌ߲߬ ߘߌ߫ ߒߞߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߝߊ߰ߟߌ ߞߍ߫ ߘߊ߫ ߟߏ߲ ߡߍ߲߸ ߊ߬ ߥߊ߫ ߘߊ߫ ߡߏ߬ߛߏ ߣߴߊ߬ߟߋ߫ ߖߍ߬ߘߍ ߓߍ߯ ߟߋ߬ ߝߊ߰ ߞߊ߲ߡߊ߬، ߏ߬ ߟߋ ߞߵߊ߬ ߟߐ߬ ߓߌ߲ߝߊ߯ߟߊ߲ ߡߌ߲߬ ߠߊ߫، ߞߊ߬ߕߎ߲߯߸ ߞߏ߫ ߣߴߌ ߞߵߊ߬ ߦߋ߫ ߊ߬ ߡߴߊ߬ ߖߘߍ߬ ߞߣߐ ߛߐ߰ ߡߎ߬ߙߎ ߟߊ߫߸ ߝߏ߫ ߞߊ߬ ߓߌ߲ߝߊ߯ߟߊ߲ ߡߌ߲߬߸ ߏ߬ ߞߎ߲߭ ߞߍ߫ ߘߴߊ߬ ߓߟߏ߫ ߡߎ߲߬ ߘߌ߫߸ ߛߴߊ߬ ߘߌ߫ ߢߊߝߐߟߌ ߘߏ߫ ߞߍ߫ ߟߊ߫ ߞߊ߬ ߞߐ߲߰ ߊ߬ ߣߌ ߡߌ߬ߘߊ ߢߍ߫، ߓߊ߬ߙߌ߬ ߥߊߦߌߞߊ߫߸ ߊ߬ ߣߴߊ߬ ߘߴߊ߬ ߦߋ߫ ߞߏ߫ ߓߌ߲ߝߊ߯ߟߊ߲ ߏ߬ ߡߊ߫ ߤߊߟߌ߬ ߊ߬ ߞߣߐ ߟߋ߬ ߓߏ߬ߙߌ߬ ߞߎߡߊߕߍ߫ ߘߏ߫ ߜߘߍ߫ ߡߊ߬.
ߓߊߘߋ߲ ߠߎ߬߸ ߡߏ߬ߛߏ ߝߊ߰ ߟߏ߲߸ ߣߊ߲߬ߕߌ߮ ߣߌ߫ ߞߟߍ߬ߡߐ߮ ߘߏ߫ ߟߎ߫ ߕߍ߬ߘߍ߫ ߦߋ߲߬߸ ߏ߬ ߟߎ߬ ߝߣߊ߫ ߟߊ߫ ߝߎߦߊ ߞߎߡߊ ߦߋ߫ ߞߊ߲ߞߊ߲߫ ߞߕߌߞߊ߲ߘߊ ߖߌߝߊ߫ ߟߊ߫، ߞߕߌߓߋߟߋ߲ ߣߐ߬ ߊ߬ ߦߌ߬ߘߊ߬ ߟߊ߫ ߏ߬ ߟߋ ߘߐ߫߸ ߞߏ߫ߏ ߊ߬ߟߎ߬ ߓߍߣߊ߬ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫ ߥߛߊ߬ߘߊ߬ߕߌ߮ ߏ߬ ߟߎ߬ ߞߊ߲ߡߊ߬߸ ߏ߬ ߟߎ߬ ߡߍ߲ ߠߎ߬ ߣߐ߬ ߞߏ ߣߌ߲߬ ߓߐ߬ߘߍ߬ߒ߬ߕߊ߲߬ߧߊ߬ ߟߊ߫ ߞߊ߬ ߣߌ߲߬߸ ߊ߬ ߓߐ߬ߘߍ߬ ߡߊ߫ ߞߍ߫ ߊ߬ߟߎ߬ ߢߣߊ߫.
ߞߕߌߞߊ߲ߘߊ ߡߊߙߎߥߊߣ ߓߊߟߑߘߋ߬ ߛߍߥߊߣߍ߲ ߠ߬ߋ ߞߊ߬ ߛߙߊ߬ߣߎ߲ ߦߌ߬ߘߊ߫ ߝߐ߬ߓߍ߬ߦߊ߬ߟߊ ߟߎ߬ ߟߊ߫ ߡߊ߬ߘߋ߲߫ ߝߘߏ߬ߓߊ߬ ߞߊ߲ ߘߐ߫߸ ߞߏ߫ ߊ߬ ߛߍߥߊߣߍ߲߫ ߞߏߛߓߍ߫، ߓߊߏ߬߸ ߞߏ ߡߍ߲ ߣߐ߬ ߖߌ߬ߣߍ߫ ߓߌ߬ߟߊ߬ ߟߊ߫ ߛߎ߫߬ߣߎ߲ ߘߐ߫߸ ߊ߬ ߕߌ߯ߕߌ߯ ߞߊ߲ߞߊ߲߫ ߛߏߞߣߐߟߊ، ߣߴߏ߬ ߞߕߌ ߕߍ߰ ߘߊ߫ ߢߊ߫ ߛߎ߮ ߣߌ߲߬ ߡߊ߬߸ ߏ߬ ߦߋ߫ ߛߍߥߊ ߟߋ߬ ߘߌ߫. ߊ߬ ߓߊ߲߫ ߘߊ߫ ߞߊ߬ ߟߊ߬ߤߘߌ ߕߊ߬ ߞߏ߫ ߊ߬ ߘߴߊ߬ ߢߊ ߕߏ߫ ߣߌ߲߬ ߞߏ ߝߍ߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
