ߞߊ߲ߞߊ߲߫ ߞߊ߬ ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌ ߛߊ߲߬ ߇߆ ߢߊ߰ߢߊ߮ ߟߋ߬ ߞߍ߫ ߂߀߂߅ ߞߏ߲ߞߏߘߓߌ ߕߟߋ߬ ߃߀ ߡߊ߬߸ ߞߊ߬ ߡߊ߲߬ߘߋ߲߬ ߟߐ߲ߠߌ߲ߦߊ ߟߎ߬ ߟߊߖߊ߲ߞߏ߫߸ ߞߊ߬ ߝߘߊ߬ߝߌ߲߬ ߞߊ߲ ߠߎ߬ ߡߐ߬ߟߐ߲߬ߡߦߊ߬. ߒߞߏ ߏ߬ ߡߍ߲ ߛߌ߲ߘߌ߫ ߘߊ߫ ߁߉߄߉ ߟߊ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫߸ ߏ߬ ߡߍ߲ ߓߘߊ߫ ߓߐߕߏ߲ ߠߎ߬ ߞߐߛߊ߬ߥߏ߫ ߓߌ߬߸ ߞߊ߬ ߞߍ߫ ߓߍ߲߭ ߣߌ߫ ߢߐ߲߯ߕߊߦߋ ߛߌߟߊ߫ ߜߍ ߘߌ߫߸ ߊ߬ ߣߌ߫ ߥߙߎߞߌ ߣߌ߫ ߟߐ߲ߠߌ߲ ߜߎ߲߬ߘߎ ߘߌ߫، ߒ߬ߓߊ߬߸ ߞߵߊ߬ ߟߊߥߟߌ߬ ߒߞߏߞߏ ߟߊߥߊ߲߬ߞߊ߲ ߏ߬ ߡߊ߬߸ ߒߞߏ ߘߏ߲߬ߖߟߎ߬ߡߊ߬ߘߊ <<ߛߍ߲ߓߊ߫>> ߕߊ߬ߣߍ߲ ߞߵߊ߬ ߟߊ߫ ߖߌ߬ߣߍ߬ ߒߞߏ ߕߐ߲ ߠߎ߬ ߞߊ߲߬߸ ߊ߬ߟߎ߬ ߣߌ߫ ߛߘߍ߫ ߘߊ߲߬ߘߌߦߊ߫ ߣߊ߯ߣߌ߲ߣߊ߲ ߠߊ߫ ߓߊ߯ߙߊߢߐ߲߯ߦߊ ߞߣߐߡߊ߬߸ ߊ߬ߟߎ߫ ߞߊ߬ ߡߐ߰ ߥߊ߯ ߦߙߌߞߊ߫ ߟߋ߬ ߟߊߛߣߍ߫ ߞߊ߬ ߓߐ߫ ߖߌ߬ߣߍ߬ ߞߣߐ߫ ߦߊ߲߬߸ ߊ߬ ߣߌ߫ ߡߊ߬ߟߌ ߟߊ߫߸ ߡߍ߲ ߠߎ߬ ߣߊ߬ ߘߊ߫ ߛߐ߬ߘߐ߲߫ ߖߊ߲߬ߖߏ߲ ߣߌ߲߬ ߘߐ߫߸ ߞߎ߲߬ߠߊ߬ߦߋ߬ߙߋ߲߬ ߖߊ߲ߖߏ߲.
߂߀߂߅ ߜߊ߬ߙߊ ߡߍ߲ ߦߋ߫ ߣߌ߲߬߸ ߊ߬ ߞߎ߲߭ ߠߎ߬ ߘߐ߫ ߓߟߋ߬ߓߟߋ ߕߎ߲߬ ߕߍ߫ ߘߏ߫ ߜߘߍ߫ ߘߌ߫߸ ߞߊ߬ ߒߞߏ ߛߋߞߏߦߊ ߦߌ߬ߘߊ߬ ߟߐ߲ߞߏ ߣߌ߫ ߟߐ߲ߠߌ߲ ߛߌߓߟߏߡߊ ߟߎ߬ ߝߊߙߊ߲ߝߊ߯ߛߌ ߘߐ߫، ߏ߬ ߟߋ ߘߐ߫߸ ߟߐ߲ߞߏ ߢߊߝߐߓߊ߯ ߡߐ߰ ߣߊ߯ߣߌ߲߫ ߛߎߥߊ߲ߘߌ߫ ߘߊ߫߸ ߡߍ߲ ߠߎ߬ ߣߊ߬ ߘߊ߫ ߟߐ߲ߞߏ ߓߏߟߏ߲ ߘߏ߫ ߟߎ߫ ߕߍ߬ߝߍ߬ߦߊ߫ ߖߊ߬ߡߊ ߦߋ߫ ߥߊ߬ߛߊߥߊ߬ߛߊ ߘߌ߫، ߊ߬ߟߎ߬ ߞߎߡߊ߫ ߘߊ߫ ߘߐ߬ߞߏ ߞߊ߲߬߸ ߘߡߊ߬ߟߐ߲ ߞߊ߲߬߸ ߖߎ߲߯ߛߊ ߞߊ߲߬߸ ߊ߬ ߣߌ߫ ߞߍ߲ߘߍߞߊߙߊ߲.
ߞߏߕߍߓߊ߲߫ ߞߡߊ߬ߙߊ߫ ߟߋ߬ ߞߊ߬ ߘߐ߬ߞߏ ߓߛߊߞߟߌߕߋ߫، ߦߟߌߡߊ߲ߘߌ ߞߐ߲ߘߍ߫߸ ߏ߬ ߞߊ߬ ߘߡߊ߬ߟߐ߲ ߞߌ߬ߛߍ ߞߍ߫ ߜߊ߬ߙߊ ߢߣߊߓߊ߮ ߟߎ߬ ߕߍ߯، ߞߎߟߎ߲ߓߊ߫ ߖߊߥߙߊ߫߸ ߏ߬ ߞߎߡߊ߫ ߘߊ߫ ߖߎ߲߯ߛߊ ߘߐ߬ߞߣߍ߬ߟߌ ߘߝߊߣߍ߲ ߘߌ߫߸ ߡߊߙߌߦߊߡ ߞߋ߬ߓߋ߸ ߏ߬ ߞߊ߬ ߞߍ߲ߘߍߞߊߙߊ߲ ߢߊߝߐ߫، ߒ߬ߓߊ߬߸ ߏ߬ ߟߎ߫ ߞߊ߲߬ߟߊ߬ ߘߊ߫ ߒߞߏ ߞߟߊ߬ߡߊ߬ߓߊ߯ ߟߊ߫߸ߡߍ߲ ߠߊ߫ ߛߙߊ߬ߣߎ߲ ߞߊ߬ ߝߏ߮ ߞߣߐ ߟߊߛߐ߲ߞߐ߫ ߛߍߥߊ ߣߌ߫ ߕߍ߯ߜߊߛߌ ߘߊ߫߸ ߏ߬ ߟߋ ߞߏ߲߬ߓߏ ߡߎߛߊ߫ ߓߊߟߊ߲ߘߎ߯ ߖߊߟߏ߫ ߘߌ߫߸ ߊ߬ߟߋ ߡߍ߲ ߞߊ߬ ߒߞߏ ߟߊ߫ ߕߎ߬ߜߍ߬ߕߎ߬ߜߍ߬ߟߌ ߢߊߝߐ ߓߊ߬ߟߊ߲ ߞߊߘߌ߫߸ ߞߊ߬ ߝߏ߮ ߞߣߐ߫ ߡߐ߮ ߟߎ߬ߎ ߟߊߞߍ߫ ߒߞߏߞߏ ߞߊ߬ߟߊߡߊ߬ ߞߏߞߎߘߊ߫، ߓߊߏ߬߸ ߊ߬ ߞߊ߬ ߒߞߏ ߛߋߞߏߦߊ ߦߌ߬ߘߊ߫ ߡߌ߬ߛߍ߲߬ ߘߊ߲ߘߐ߫ ߢߊߝߐߟߌ ߘߐ߫߸ ߖߌ߬ߣߍ߬ ߞߊ߲߫ ߓߐߣߍ߲߫ ߢߐ߲߰ ߡߊ ߟߎ߬ ߢߊߝߐ ߘߐ߫ ߒߞߏ ߛߓߍߘߋ߲ ߠߊ߫.
ߜߊ߬ߙߊ ߣߌ߲߬ ߢߣߊߓߊ߯ߦߊ߫ ߘߊ߫ ߡߐ߰ ߥߊ߯ ߝߌ߬ߟߊ߬ ߣߌ߫ ߝߊ߲ߘߊ߫ ߟߋ߬ ߓߟߏ߫߸ ߞߊ߬ߙߊ߲߬ߘߋ߲ ߠߎ߬ ߣߌ߫ ߟߞߊ߬ߙߊ߲߬ߠߌ߲߬ߠߊ ߟߎ߬ ߕߘߍ߬ ߞߣߍ ߞߊ߲߬߸ ߒߞߏ ߕߌߙߌ߲ߠߌ߲ߠߊ ߟߎ߬ ߣߌ߫ ߝߘߊ߬ߝߌ߲߬ߧߊ ߞߊ߬ߣߌ߲߬ߓߊ߮ ߟߎ߬ ߡߊ߫ ߕߏ߫ ߞߐ߫߸ ߞߎߡߊߕߍ߫ ߝߘߊ߬ߝߌ߲߬ߠߊ߬ ߞߊ߲ߞߏ ߛߍ߬ߘߏ߲߬ߠߊ ߟߎ߫ ߡߊ߬. ߏ߬ ߓߍ߯ ߕߊ߬ߡߌ߲߬ ߘߊ߫ ߒߞߏ ߡߊߦߋߙߋ߲߫ ߠߊ߫߸ ߞߊ߬ ߢߊߝߐߟߌ ߟߎ߬ ߞߍ߫ ߡߐ߱ ߟߎ߬ ߢߣߊ߫ ߛߎߓߊ߯ߦߊ߫ ߞߏ ߘߌ߫߸ ߡߍ߲ ߞߊ߬ ߓߍ߯ ߟߤߊߕߍߦߊ߫ ߒߞߏ ߟߊ߫ ߟߐ߲ߞߏ߫ ߛߓߍߟߌߦߊ ߡߊ߬.
ߜߊ߬ߙߊ ߣߌ߲߬ ߘߊߡߌ߬ߣߊ ߘߐ߫߸ ߞߐ߬ߟߏ߲ ߂߀߂߅ ߞߏ߲ߞߏߘߓߌ ߕߋ߬ߟߋ߫ ߂߉ ߡߊ߬߸ ߛߐ߰ ߞߍ߫ ߘߊ߫ ߛߏߘߐߦߊ߯ߟߊ ߟߋ߬ ߡߊ߬، ߞߵߊ߬ ߕߊ߬ ߞߏ߬ߡߙߊ߬ߟߊ߫ ߡߊ߬ ߡߊ߬ ߞߊ߬ ߕߊ߯ ߊ߬ ߓߌ߬ߟߊ߫ ߓߊ߬ߕߏ߲߬ߓߊ ߟߊ߫߸ ߖߊ߬ߡߊ߫ ߞߐ߬ߙߐ߲ߜߐ߲߬ߜߐ߲ ߠߋ߬ ߞߵߊ߬ߟߎ߫ ߕߎ߲߰ ߢߐ߲߮ ߞߐ߫ ߟߐ߬ߖߟߎ߬ߡߊ ߕߊ߯ߡߊ߫ ߦߙߍߕߍߕߍ ߘߌ߫߸ ߢߊ߰ߢߊ߮ ߥߎ߬ߘߊ߲ ߘߝߊߣߍ߲ ߘߐ߫، ߞߐߣߊߞߙߌ߫ ߗߋߘߋ߲ ߠߎ߬߸ ߛߌ߯ߙߌ߲߫߸ ߞߘߏ߬ߛߊ߫߸ ߞߛߌ߬ߘߎ߯߸ ߡߊ߲߬ߖߊ߲߬ߠߊ߫߸ ߛߞߍ߬߸ ߣߏߙߊߛߏߓߊ߫߸ ߖߞߋߘߎ߯߸ ߘߌ߲ߖߌߙߊߦߌ߫߸ ߓߡߊ߬ߞߐ߫߸ ߞߵߏ߬ ߟߊ߫ ߘߌ߲߬ߞߌ߬ߙߊ߬ ߛߌߦߊߡߊ߲߫ ߡߐ߰ ߣߊ߬ߣߍ߲ ߠߎ߬ ߞߊ߲߬߸ ߏ߬ ߟߎ߬ ߓߍ߯ ߕߘߍ߬ ߕߊ߯ߡߊ߫ ߕߏ߲ ߣߌ߲߬ ߘߐ߫، ߖߊ߲߬ߖߏ߲ ߣߊߓߘߍ߸ ߓߐ߬ߟߐ߲߬ߞߊ߬ ߛߊߘߊ߲߫ ߞߡߊ߬ߙߊ߬ ߡߊ߫ ߕߏ߫ ߞߐ߫߸ ߊ߬ ߝߣߊ߫ ߕߍ߬ߘߍ߫ ߕߐ߲߬ߕߐ߲ ߣߌ߲߬ ߘߐ߫߸ ߞߵߏ߬ ߟߊ߫ ߊߓߎߓߞߊߙ ߞߐ߲ߘߍ߫ ߞߊ߲߬߸ ߊ߬ߟߋ ߡߍ߲ ߞߊ߬ ߖߊ߲߬ߖߏ߲ ߝߊ߬ߓߘߍ ߡߊ߬ߡߊ߬ߘߎ߬ߓߊ߬ ߕߐߛ ߞߡߊ߬ߙߊ߫ ߣߐ߬ߘߐߓߌ߬ߟߊ߬ ߕߊ߯ߡߊ ߣߌ߲߬ ߘߐ߫.
ߘߏ߲߬ߛߏ ߟߎ߬ ߡߊ߫ ߕߏ߫ ߞߐ߫߸ ߡߊ߲߬ߘߋ߲߬ ߘߏߕߌ߮ ߟߎ߬، ߘߎ߬ߣߎ߲߬ߓߊ߬ ߝߐ߬ߟߊ ߟߎ߬߸ ߣߊߟߌ߬ߡߎ߲߬ ߣߎߓߊ ߝߊ߲ߝߊ߯ߙ ߝߐߟߊ ߟߎ߬ ߘߌ߫߸ ߏ߬ ߟߎ߫ ߞߊ߬ ߕߊ߯ߡߊ ߣߌ߲߬ ߞߘߐߛߌ߰ ߝߐߟߌ߫ ߡߌ߬ߙߌ߲߬ߡߊ ߟߎ߬ ߟߊ߫، ߘߋߣߍ߲ ߠߎ߬ ߣߌ߫ ߡߏ߬ߛߏ ߟߎ߬߸ ߟߐ߲ߠߌ߲ߦߊ ߞߊ߬ߣߌ߲߬ߓߊ߮ ߟߎ߬߸ ߏ߬ ߟߎ߬ ߓߍ߯ ߟߋ߬ ߞߊ߬ ߕߊ߯ߡߊ ߣߌ߲߬ ߘߐߘߌߦߊ߫ ߕߘߋߞߊߕߘߋߞߊ߫، ߕߊ߯ߡߊ ߣߌ߲߬ ߘߏ߲߬ ߞߎ߲߭ ߡߊ߫ ߞߍ߫ ߘߏ߫ ߜߘߍ߫ ߘߌ߫߸ ߛߊ߫ ߞߊ߬ ߝߊ߬ߛߏ߬ ߞߊ߲ ߠߎ߬ ߟߊߞߎ߲߬ߠߊ߬ߛߌ߰ߦߊ߬ ߞߏ ߡߙߌߦߊ ߞߐߡߊߓߌ߲ߓߌ߲߫ ߖߌ߬ߣߍ߬ ߞߊ߲ߓߍ߲ ߛߌ߰ߞߊ߲߬ ߞߎߘߊ߫ ߣߊ߬ߕߐ ߞߣߐ߫.
ߞߎߣߎ߲ߟߏ߲ ߂߀߂߅ ߞߏ߲ߞߏߘߓߌ ߕߟߋ߬ ߃߀ ߟߋ߬ ߞߍ߫ ߘߊ߫ ߜߊ߬ߙߊ ߟߏ߲ߓߊ ߘߌ߫߸ ߓߋߟߋ߲ߠߊ߫ ߝߊߘߌ߲ ߠߎ߬ ߟߊߛߐ߲ߞߐ߫ ߘߊ߫ ߡߍ߲ ߘߐ߫، ߓߊߛߓߊ߬ߕߌ߫ ߛߘߌ߬ߓߋ߫ ߞߵߊ߬ ߦߌ߬ߘߵߊ߬ ߟߊ߫ ߟߊ߬ߛߣߍ߬ߟߌ߬ ߓߋߟߋ߲ߠߊ ߘߐ߫߸ ߞߏ߫: << ߓߌ߬߸ ߊ߲ ߡߊ߫ ߣߊ߬ ߢߊ߰ߢߊ߮ ߘߐߙߐ߲߫ ߞߊ߲ߡߊ߬ ߘߋ߬، ߊ߲ ߣߊ߬ߣߍ߲߫ ߒ߬ ߠߊ߫ ߘߐ߬ߝߐ ߞߎ߲߬ߠߊ߬ߦߋ߬ߙߋ߲߬ ߡߊ߬ߝߊ߲ ߘߏ߫ ߟߋ߬ ߦߌ߬ߘߊ߬ ߞߊ߲ߡߊ߬߸ ߞߵߊ߲ ߝߊ߬ ߟߎ߬ ߗߍ ߕߊ߬߸ ߞߵߊ߲ ߝߊ߲߬ߞߊ ߣߴߊ߲ ߛߋߞߏ ߦߌ߬ߘߊ߬߸ ߣߴߊ߬ ߡߊ߫ ߢߊ߬ ߞߏ߫ ߊ߲ ߓߘߊ߫ ߥߟߌ߬߸ ߛߓߍߟߌ ߦߴߊ߲ ߓߟߏ߫߸ ߞߏߟߐ߲ ߦߴߊ߲ ߓߟߏ߫߸ ߝߘߊ߬ߝߌ߲߬ߠߊ߬ ߟߊߞߎߣߎ߲ ߣߴߊ߬ ߟߊߥߙߎߞߌ ߛߌߟߓߊ ߞߊ߲߬߸ ߖߘߍ߬ߞߊ߲ ߞߣߐ߫.>>
ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫: <<<<ߒߞߏ ߣߊ߬ߣߍ߲߫ ߝߘߊ߬ߝߌ߲߬ ߞߊ߲ ߓߍ߯ ߟߋ߬ ߦߋ߫>> ߊ߲ߠߎ߬ ߟߋ߬ ߞߊ߫ ߞߊ߲߫ ߞߵߊ߲ ߠߊ߫ ߞߊ߲ ߠߎ߬ ߛߓߍ߫ ߊ߬ ߘߐ߫ ߛߍߣߍ߲߬߸ ߞߊ߬ ߘߍ߬ ߛߓߍߟߌ߫ ߞߋߟߋ߲߫ ߠߊ߫߸ ߞߵߊ߲ ߖߘߍ߬ߞߊ߬ߣߌ߲߬ ߟߐ߲ߠߌ߲ ߞߊ߲ߞߋߦߊ ߟߊߘߊ߲߫، ߓߊߏ߬߸ ߊ߬ ߘߌ߫ ߛߴߊ߬ ߓߍ߯ ߛߓߍ߫ ߟߊ߫߸ ߛߏ߬ߛߏ ߓߊ߬߸ ߝߌߟߊ ߓߊ߬߸ ߞߌ߬ߛߌ ߓߊ߬߸ ߜߙߍ߬ߛߍ ߓߊ߬߸ ߊ߬ ߘߌ߫ ߛߴߊ߬ ߓߍ߯ ߟߊ߫ ߞߊ߲ ߛߓߍ߫ ߟߊ߫.>>
ߊ߬ ߓߊ߲߫ ߘߊ߫ ߝߣߊ߫߸ ߝߊ߬ߛߏ߬ ߞߊ߲ ߠߎ߬ ߟߊߞߎ߲߬ߠߊ߬ߛߌ߰ߦߊ߬ ߞߏ ߛߌ߰ߞߊ߲߬ ߞߎߘߊ ߞߣߐ߫߸ ߊ߬ ߞߵߏ߬ ߕߊ߲߬ߘߏ߬ߟߌ ߞߍ߫ ߞߏߛߓߍ߫، ߞߵߊ߬ ߦߌ߬ߘߊ߬ ߞߏ߫: << ߊ߲ ߓߘߴߊ߬ ߡߍ߲߫ ߞߏ߫ ߊ߲ ߠߊ߫ ߞߊ߲ ߠߎ߬ ߓߘߊ߫ ߟߊߞߎ߲߬ߠߊ߬ߛߌ߰ߦߊ߫ ߛߌ߰ߞߊ߲߬ ߞߎߘߊ ߘߐ߫߸ ߛߋ.ߍߣ.ߕߋ ߓߘߊ߫ ߡߍ߲ ߠߊߘߌ߬ߢߍ߬، ߏ߬ ߦߋ߫ ߞߏߓߊ߫ ߟߋ߬ ߘߌ߫ ߘߎߢߊ߫ ߘߐ߫ ߘߋ߬. ߊ߲ ߧߋ߫ ߞߏ߲߬ߓߏ ߘߊ߲߬ߛߊ߫ ߞߙߎ߬ߡߊ߫ ߝߏ߬ ߟߊ߫߸ ߊ߬ ߞߊ߬ ߟߊ߬ߤߘߌ ߡߍ߲ ߕߊ߬ ߓߏ߲ ߣߌ߲߬ ߞߣߐ߫ ߦߊ߲߬߸ ߊ߬ ߓߘߴߏ߬ ߡߝߊ߫.>>
ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߘߏ߲߬ߖߟߎ߬ߡߊ߬ߟߌ߬ߟߊ߸ ߛߟߊߕߌ߯ ߛߘߌ߬ߓߋ߫ ߞߊ߬ ߞߟߌߟߌ ߟߐ߬ ߞߊ߲ߓߍ߲ ߞߊ߲ߕߌ߮ ߡߊ߬: << ߊ߲ ߘߌ߫ ߞߊ߲ߕߌ߯ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߝߏ߬߸ ߞߊ߬ ߓߊ߲߫ ߞߵߊ߲ ߞߊ߲ߠߊߘߌ߫ ߊ߬ ߡߊ߬߸ ߊ߬ߟߋ ߡߍ߲ ߦߋ߫ ߖߡߊ߬ߣߊ ߣߌ߲߬ ߘߋ߲ ߘߏ߫ ߘߌ߫߸ ߡߍ߲ ߝߊ߬ ߖߡߊߣߊ ߞߊ߫ ߘߴߊ߬ ߦߋ߫߸ ߊ߬ ߞߵߊ߬ ߖߘߍ߬ ߟߐ߲߫: ߞߊ߲ߕߌ߮߸ ߊ߲ ߧߴߌ ߞߐ߫. ߊ߲ ߞߵߊ߬ ߟߐ߲߫ ߕߊߦߌ߫߸ ߞߏ߫ ߌ ߝߊ߬ ߘߎ߯ߞߟߏ ߘߌߡߊ߲߫ ߌ ߦߋ߫߸ ߌ ߞߴߌ ߓߐ߫ ߦߙߐ ߟߐ߲߫. ߒ߬ߓߊ߬߸ ߖߌ߬ߣߍ߫ ߝߊ߬ߛߏ߬ ߞߊ߲ ߠߎ߬ ߞߊ߬ߙߊ߲ ߊ߲ ߠߊ߫ ߞߊ߬ߙߊ߲߬ߕߊ ߟߎ߬ ߟߊ߫߸ ߏ߬ ߟߋ ߊ߲ ߣߌߘߐߞߏ ߘߌ߫ ߤߊ߲߫߸ ߊ߲ ߠߊ߫ ߞߊ߲ ߏ߬ ߟߎ߫ ߟߋ߬ ߖߡߊ߬ߣߊ ߞߊ߲ ߘߌ߫߸ ߏ߬ ߟߎ߫ ߟߋ߬ ߜߎ ߦߋ߫ ߞߎ߲߬ߠߊ߬ߦߋߙߋ߲ ߞߊ߲ ߘߌ߫. ߊ߲ ߟߊߣߴߊ߬ ߟߊ߫߸ ߞߊ߲ߕߌ߮ ߘߌ߫ ߡߍ߲߫ ߖߐ߫.>>
ߖߊ߲߬ߖߏ߲ ߣߌ߲߬ ߡߊ߫ ߝߐ߫ ߡߊ߬ߞߟߐ ߟߎ߬ ߞߐ߫ ߘߋ߬، ߊ߬ ߝߊ߬ߦߊ ߘߌ߫ ߘߊ߫ ߡߊ߬ߡߊ߬ߘߎ߬ߓߊ߬ ߕߐߛ ߞߡߊ߬ߙߊ߫ ߟߋ߬ ߡߊ߬߸ ߡߊ߬ߕߏ߯ߕߏ߬ ߞߊ߬ߝߏ߬ߙߋ߲ ߞߊ߬ߝߏ߬ߙߋ߲߬ߕߌ߰ ߞߘߐ߸ ߊ߬ߟߋ ߡߍ߲ ߕߊ߲߬ߘߏ߬ ߘߊ߫ ߜߊ߬ߙߊ ߣߌ߲߬ ߛߌ߲߬ߝߏ߲߬ߧߊ߬ߓߊ߮ ߟߎ߬ ߓߟߏ߫ ߊ߬ ߟߊ߫ ߞߍߣߍ߲ ߠߎ߬ ߞߏߛߐ߲߬. ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫: <<ߞߊ߲ߕߌ߮ ߖߍ߬ߘߍ ߓߘߴߊ߲ ߠߊ߫ ߞߊ߲ ߠߊߘߏ߲߬ ߛߌ߰ߞߊ߲ ߞߣߐ߫، ߓߊ߯ߙߊ ߦߴߊ߲ߠߎ߬ ߟߋ߬ ߓߟߏ߫ ߡߎ߬ߕߎ߲߬ ߛߊ߫߸ ߞߊ߬ ߛߋ߫ ߡߐ߱ ߟߎ߬ ߟߊߓߐ߫ ߟߊ߫߸ ߛߴߊ߬ߟߎ߬ ߘߌ߫ ߕߊ߯ ߊ߬ߟߎ߬ ߛߙߍߘߍߦߊ߫ ߞߊ߲ߘߟߌ ߝߍ߬.>>
ߖߊ߲߬ߖߏ߲ ߣߊߓߘߍ߸ ߞߐ߲ߘߍ߫ ߟߊ߫ ߓߐ߬ߟߐ߲߬ߞߊ ߛߊߙߊ߲߬ ߞߡߊ߬ߙߊ߬ ߡߍ߲ ߦߋ߫ ߡߝߊߞ ߞߊ߲ߕߌ߮ ߘߌ߫߸ ߏ߬ ߞߵߊ߬ ߛߍߥߊߣߊ߲߫ ߞߊ߲ ߦߌ߬ߘߊ߬߸ ߞߊ߬ ߡߏ߬ߛߏ ߟߎ߬ ߞߟߌ߫ ߒߞߏ ߞߊߙߊ߲ ߡߊ߬، <<ߊ߲ߠߎ߬ ߟߋ߬ ߟߎ ߡߊ߬߸ ߊ߲ߠߎ߬ ߟߋ߬ ߘߋ߲ ߠߎ߬ ߖߏ߯ߘߏ߲ߠߊ ߝߟߐߡߊ ߘߌ߫، ߊ߬ ߕߎ߬ߡߊ ߓߘߊ߫ ߛߋ߫ ߡߎ߬ߕߎ߲߬߸ ߞߊ߬ ߒߞߏ ߞߊ߬ߙߊ߲߬، ߛߓߍߟߌ߫ ߣߐ߲߮ ߠߋ߬߸ ߡߍ߲ ߟߐ߲߫ ߘߌߡߊ߲߫߸ ߛߌߣߌ߲ߢߍߛߌ߮ ߟߋ߬ ߘߏ߲߬ ߦߴߊ߬ ߘߌ߫ ߝߋߎ߫.
ߖߊ߲߬ߖߏ߲ ߣߌ߲߬ ߓߏ߲߬ߧߊ ߘߌ߫ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߓߊ߮ ߟߋ߬ ߡߊ߬߸ ߛߟߊߕߌ߮ ߡߎߛߊ߫ ߞߋߕߊ߬، ߏ߬ ߕߘߍ߬ ߞߣߍ ߞߊ߲߬، ߛߟߊߕߌ߮ ߞߊ߲ߞߊ߲߫ ߡߙߊ߬ߓߊ߰ߘߊ ߟߊ߬ߞߟߏ߬ߞߟߏ߬ߟߌ ߗߋߕߌ߮߸ ߛߎ߬ߟߋ߬ߡߊߣ ߘߊ߬ߝߋ ߕߘߍ߬ ߞߣߍ ߞߊ߲߬.
ߝߊ߰ߡߊ߫ ߣߊ߬ߣߍ߲ ߠߎ߬ ߘߐ߫:
• ߞߊ߲ߞߊ߲߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ ߞߐߦߌߘߊ ߕߍ߬ߘߍ߫ ߦߋ߲߬߸ ߛߟߊߕߌ߯ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫߸ ߊ߬ߟߋ ߡߍ߲ ߦߋ߫ ߕߌ߲߬ߞߎߘߎ߲ ߞߌ߬ߓߊ߬ߙߏ߬ߦߊ߬ߟߌ ߣߌ߫ ߟߊ߬ߟߐ߲߬ߠߌ߲߬ߠߌ߲ ߗߋߕߌ߮ ߘߌ߫،
• ߞߊ߲ߞߊ߲߫ ߡߙߊ߬ߓߊ߮ ߞߊ߲ߖߊ߬ ߡߊ߰ߙߊ ߕߍ߬ߘߍ߫ ߦߋ߲߬
• ߛߟߊߕߌ߯ ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫߸ ߝߊ߬ߛߏ ߗߋߕߌ߯ ߛߙߍߞߍ ߟߵߏ߬ ߘߌ߫ ߟߊ߬ߛߓߍ߬ߛߎ߲߬ߧߊ߬ߟߌ ߞߏߕߌ߯ߘߊ ߟߊ߫.
• ߞߏ߲߬ߓߏ߫ ߡߏ߬ߤߊ߬ߡߍ߬ߘ ߟߊߡߌߣ ߞߋߕߊ߬ ߕߘߍ߬ ߞߣߍ ߞߊ߲߬߸ ߌߙߑߟߊ ߟߊ߫.
• ߗߋߕߌ߮ ߟߎ߬߸ ߞߌ߲߬ߕߌ߮ ߟߎ߬߸ ߘߋ߲ߡߌߛߍ߲߫ ߞߎ߲ߕߌ߮ ߟߎ߬߸ ߛߘߍ ߟߎ߬ ߞߐߦߌߘߊ߸ ߛߊߣߌ߲߫ ߓߊ߯ߙߟߊ ߟߎ߬߸ ߦߏ߫ ߓߊ߬ߙߌ߫ ߞߎ߬ߟߌߓߊ߬ߟߌ߬ ߣߌ߫ ߛߋ߬ߦߌߘߎ߬ ߞߡߊ߬ߙߊ߬߸ ߏ߬ ߟߎ߫ ߕߘߍ߬ ߞߣߍ ߞߊ߲߬.
ߖߊ߲߬ߖߏ߲ ߣߌ߲߬ ߘߊߞߎ߲ ߘߐ߫߸ ߞߐ߲ߘߐ߲ ߘߌ߫ ߘߊ߫ ߡߐ߰ߓߊ߬ ߛߌߦߊߡߊ߲߫ ߡߊ߬، ߞߏ߲߬ߓߏ ߎߛߑߡߊߣߌ߲߬ ߞߊ߬ߓߊ ߞߐ߲ߘߐ߲ߕߌ߯ߦߊ߫ ߘߊ߫، ߞߏ߲߬ߓߏ߫ ߘߊ߲߬ߛߊ߫ ߞߙߎ߬ߡߊ߬ ߞߐ߲ߘߐ߲ߕߌ߯ߦߊ߫ ߘߊ߫، ߞߎߡߊߕߍ߫ ߡߊ߲߬ߘߋ߲߬ ߓߏߟߏ߲ ߣߌ߫ ߖߋ߬ߟߌ߬ߕߐ߲߬ߓߊ ߡߊ߬، ߊ߬ ߘߊ߲߬ ߕߴߏ߬ ߘߌ߫ ߘߋ߬߸ ߛߏ߬ߙߌ߫ ߡߊ߲߬ߘߋ߲߬ߞߊ ߡߍ߲ ߦߋ߫ ߥߎ߬ߦߊ߲߬ߞߌ߬ߟߌ߫ ߝߊ߬ ߘߌ߫߸ ߏ߬ ߞߊ߬ ߞߐ߲ߘߐ߲ ߘߌ߫ ߡߊ߲߬ߘߋ߲߬ ߕߐ߯ߞߏ ߟߊߞߎߣߎ߲ߓߊ߮ ߘߏ߫ ߟߎ߫ ߡߊ߬، ߞߏ߲߬ߓߏ ߡߎߛߊ߫ ߓߊߟߊ߲ߘߎ߯ ߖߊߟߏ߫߸ ߏ߬ ߝߣߊ߫ ߞߊ߬ ߡߊ߲߬ߘߋ߲߫ ߡߐ߬ߟߐ߲ ߞߝߊ߬ ߤߏߞߌ ߘߐߞߊ߬ߙߊ߲߬ߓߊ߮ ߘߏ߫ ߟߎ߫ ߞߐ߲ߘߐ߲߫.
ߟ.ߞ.ߝ ߘߍ߬ߞߙߍ ߝߣߊ߫ ߞߵߊ߬ ߟߊ߫ ߞߊ߬ߙߊ߲߬ߘߋ߲߬ ߛߌߦߊߡߊ߲߫ ߠߊ߫ ߖߐ߲ߓߐ߲ ߘߴߊ߬ߟߎ߫ ߡߊ߬߸ ߏ߬ ߞߊ߬ ߝߏ߮ ߞߣߐ߫ ߡߐ߮ ߟߎ߬ ߟߊߛߍߥߊ߫.
ߒߞߏ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ (ߒ.ߥ.ߛ.ߖ) ߞߊ߲ߕߌ߯ ߛߙߍߞߍ߸ ߞߊ߬ߙߊ߲߬ߡߐ߯ ߛߏ߬ߟߏ߫ ߝߙߊ߬ߓߊ ߺ ߘߐ߫ ߛߌ߬ߛߋ߫ ߞߊ߬ ߓߋߟߋ߲ߠߊ߫ ߞߟߊߒߞߋ߫ ߞߍ߫߸ ߞߊ߬ ߒߞߏ ߛߓߍߟߌ ߟߊ߫ ߛߊ߲ߡߊߦߋߙߋ߲߫ ߞߏߓߊ ߘߏ߫ ߘߟߊߝߎߟߌ ߕߐ߭ ߟߛߊߣߌ߲ߧߊ߫߸ ߞߵߊ߬ ߓߍ߲߬ ߊ߬ ߟߊߘߏ߲߭߭ ߡߊ߬ ߜ߭ߎ߯ߜ߭ߐߟ ߘߟߊߡߌߘߊߟߊ߲ ߞߣߐ߫߸ ߞߵߊ߬ ߦߌ߬ߘߊ߬ ߞߏ߫ ߛߋߒߞߏߟߊߘߐߦߊ ߓߊ߯ߙߊ߫ ߞߎ߲ߓߊ ߟߎ߬ ߝߣߊ߫ߖ ߦߋ߫ ߛߋ߲߬ߠߊ߫߸ ߦߏ߫ ߦߟߌߟߊ߲ߘߌߦߊ߫ ߘߍ߲߰ߦߊ߬ߣߍ߲ ߕߊ߫ ߝߊ߲߭ ߝߍ߬.
ߖߌ߬ߣߍ߬ ߣߌ߫ ߖߌ߬ߣߍ߬ ߞߐߞߊ߲ߠߊ ߘߐ߫߸ ߡߐ߱ ߟߎ߬ ߓߐ߫ ߘߊ߫ ߝߊ߲߬ ߛߌߦߊߡߊ߲߫ ߠߋ߬ ߘߐ߫ ߥߎ، ߒ߬ߓߊ߬߸ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߟߊ߫ ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߒߞߏ ߞߎ߲߬ߠߊ߬ߦߋ߬ߙߋ߲߬ ߖߊ߲ߖߏ߲ ߠߋ߬ ߘߌ߫߸ ߞߵߊ߬ ߦߌ߬ߘߊ߬ ߞߏߏ߫ ߒߞߏ ߓߘߊ߫ ߞߍ߫ ߟߐ߲ߞߏ ߢߊߝߐߟߊ߲ ߘߌ߫߸ ߊ߬ ߓߘߊ߫ ߞߍ߫ ߓߊߘߋ߲ߧߊ ߘߐߘߌߦߊ ߛߌߟߊ߫ ߜߍ ߘߌ߫߸ ߊ߬ ߓߘߊ߫ ߡߐ߰ߦߊ ߟߊߥߙߎߞߌ ߡߎ߬ߙߊ߲ ߘߏ߫ ߘߌ߫، ߏ߬ ߘߐ߫߸ ߞߎߡߊ߫ ߝߌ߬ߟߊ߬ ߕߍ߫߸ ߞߋߟߋ߲߫ ߔߋ߫ ߟߋ߬: ߝߘߊ߬ߝߌ߲߬ ߞߊ߲ ߠߎ߬ ߝߣߊ߫ ߓߘߊ߫ ߛߋ߫ ߕߊ߭ ߡߊ߬ ߟߞߊ߬ߙߊ߲߬ߠߌ߲ ߘߊߞߎ߲ ߘߐ߫ ߏ߬ ߞߐ߫߸ ߡߊ߬ߡߙߊ߬ߟߌ ߘߊߞߎ߲ ߘߐ߫ ߏ߬ ߞߐ߫߸ ߞߵߊ߬ ߞߍ߫ ߖߡߊ߬ߣߊ ߟߊߘߊ߲߫ ߝߋ߲ ߘߏ߫ ߘߌ߫߸ ߡߍ߲ ߘߌ߫ ߞߍ߫ ߖߡߊ߬ߣߊ߬ߘߋ߲ ߠߎ߬ ߛߊ߬ߥߏ ߘߌ߫.
ߛߌߟߊߓߐߛߐ߯ߣߊ߫ ߛߘߍ ߡߍ߲ ߠߎ߬ ߕߘߍ߬ ߞߣߍ ߞߊ߲߬: ߛߌߕߊ߲߬ ߞߊ߬ߓߊ߸ ߡߐ߰ߟߊ߲߬ߘߌ߫ ߡߊ߰ߛߎߓߊ߫߸ ߝߊ߲ߕߊ߫ ߞߊߙߌߝߊ߫ ߛߘߌ߬ߓߋ߫، ߖߐ߲߬ߡߊߛߌߣߌ߲ߟߐ߲߫ ߞߊ߬ߟߐ߸ ߛߎ߯ߟߊ߲ߘߌ߫ ߛߊ߬ߞߐ߫߸ ߟߊ߲߱ߛߌ߬ߣߍ߬ ߜ߭ߊߟߌߟߋ߫ ߞߡߊ߬ߙߊ߬߸ ߖߌ߬ߓߙߌߟ ߞߐ߲ߘߍ߫߸ ߛߎ߬ߟߋ߬ߡߊߣ ߛߊ߲ߜ߭ߊߙߋ߫.
