ߞߊ߲ߕߌ߮ ߊߟߌߝߊ߫ ߞߐ߲ߘߍ߫ ߞߊ߬ ߡߊ߬ߞߎ߲ ߖߎ߬ߟߎ ߘߐߕߍ߰، ߓߊߏ߬߸ ߂߀߂߅ ߞߏ߲ߞߏߘߓߌ ߕߟߋ߬ ߅ ߡߊ߬߸ ߏ߬ ߡߍ߲ ߓߍ߲߬ ߘߊ߫ ߞߍ߲ߘߍߟߏ߲ ߡߊ߬߸ ߊ߬ ߟߊ߫ ߞߙߎߞߊ ߡߊ߫ ߛߴߊ߬ߟߎ߬ ߟߊ߫ ߝߘߏ߬ߓߊ߬ ߜߙߊ ߞߍ߫ ߟߊ߫߸ ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊߘߎ߲ ߘߌ߫ ߞߊߙߏ߫ ߛߊ߬ߓߊ߫ ߞߎ߲߬ߕߊ߯ ߞߣߐ߫، ߏ߬ߟߋ ߞߏ ߡߊ߫ ߓߍ߲߬ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߡߊ߬ ߛߊ߫߸ ߝߏ߫ ߊ߬ ߞߊ߬ ߟߊ߬ߥߊ߲߬ߞߊ߲߬ߠߌ߲ ߘߏ߫ ߞߍ߫ ߊ߬ ߟߊ߫ ߝߍߛߑߓߎߞ ߞߐߜߍ ߞߊ߲߬ ߸ ߞߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߖߊ߬ߡߊ ߡߊߝߌ߲߬߸ ߊ߬ߟߎ߬ ߞߍ ߘߍ߫ ߞߊ߬ ߓߘߍ߬ߓߘߍ߬ߟߌ ߞߟߍ߬ߦߊ ߘߏ߫ ߟߎ߫ ߞߍ߬ߙߍ߲߬ߘߍ߫ ߊ߬ ߟߊ߫ ߞߙߎߞߊ ߛߋ߲߬ߞߘߐ߬ߡߊߕߍ߰ ߞߊ߲ߡߊ߬߸ ߞߵߊ߬ߟߎ߫ ߟߊ߲߰ߝߏ߲߬.
ߞߊ߬ߕߎ߲߯߸ ߞߍ߲ߘߍߟߏ߲ ߡߍ߲ ߦߋ߫ ߞߙߎߞߊ߫ ߛߌߦߊߡߊ߲߫ ߠߊ߫ ߟߊ߬ߘߍ߬ ߟߏ߲ ߘߌ߫߸ ߝߊ߬ߛߏ ߞߟߍ߬ߡߐ߰ߘߊ ߞߵߊ߬ ߟߊ߫ ߥߛߊ߬ߘߊ߬ߕߌ߮ ߟߎ߬ ߟߛߊߙߌ߫ ߟߊ߫ ߝߊ߲߭ ߓߍ߯ ߟߊ߫߸ ߞߊ߬ ߕߊ߯ ߞߙߎߞߊ߫ ߟߊߘߎ߲ߣߍ߲ ߠߎ߬ ߟߊ߫ ߝߊ߲ߓߊ ߟߎ߬ ߜߋ߬ߟߎ߲߬߸ ߖߐ߲߰ߛߴߊ߬ ߝߋ߲߫ ߞߊߣߊ߬ ߛߊ߬ߙߌ߬ߦߊ߫ ߛߐ߬ߛߐ߬߸ ߞߊ߬ ߝߘߏ߬ߓߊ߬ ߜߙߊ ߞߍ߫ ߞߵߊ߬ ߛߐ߬ߘߐ߲߬ ߏ߬ ߞߎ߬ߡߊ߲߬ߘߌ߬ߣߍ߲߫ ߠߵߊ߬ߟߎ߫ ߡߊ߬، ߓߊߏ߬߸ ߘߎ߰ߞߣߍ ߡߊ߬ߡߙߊ߬ߟߌ ߞߏߕߌ߯ߘߊ ߓߘߊ߫ ߞߙߎߞߊ߫ ߂߈ ߠߊߘߎ߲߫ ߖߌ߬ߣߍ߬ ߞߣߐ߫߸ ߞߵߏ߬ ߞߎ߲߭ ߞߍ߫ ߞߏ ߘߏ߫ ߟߎ߫ ߘߝߊߓߊߟߌߦߊ ߘߴߊ߬ߟߎ߬ ߟߊ߫ ߞߏ ߘߐ߫.
ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߞߊ߲߫ ߞߏ߫: <<ߊ߬ߟߎ߬ ߦߴߊ߬ ߝߍ߬ ߞߊ߬ ߝߘߊߝߘߊߟߌ ߛߍ߲߭ ߠߋ߬ ߕߘߎ߫߸ ߞߵߊ߲ ߠߊߘߊ߲߬ ߛߌߟߊ߫ ߟߊ߫، ߓߊ߬ߙߌ߬ ߥߊߦߌߞߊ߫߸ ߊ߬ߟߎ߫ ߢߌ߬ߣߊ߬ߣߍ߲߫ ߠߋ߬ ߞߏ߫ ߞߍߞߋߟߋ߲ߘߌ ߟߋ߬ ߒ߬ߠߎ߬ ߟߊ߫ ߞߟߍ߬ߡߎߙߊ߲߫ ߝߊ߲߬ߞߊ߬ߡߊ ߘߌ߫.>>
ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߦߋ߫ ߖߌ߬ߣߍ߬ ߞߊ߲ߕߌ߯ ߞߘߐ ߟߋ߬ ߘߌ߫߸ ߡߍ߲ ߞߊ߬ ߂߀߁߀ ߣߌ߫ ߂߀߂߁ ߕߍߟߊ ߞߍ߫ ߞߊ߲ߕߌ߯ߦߊ ߟߊ߫، ߒ߬ߓߵߊ߬ ߓߘߊ߫ ߘߎ߲߬ߓߎ߬ߦߊ߬ ߕߟߋ ߣߌ߲߬ ߞߎ߲߬ߠߊ߬ߛߌ߮ ߟߎ߬ ߡߊߝߌ߲߬ ߝߘߊߝߘߊߟߌ߫ ߞߏ ߘߐ߫: ߞߊ߬ ߞߎ߲߬ߠߊ߬ߛߘߌ ߛߌ ߝߏ߬ߦߌ߫ ߘߍ߬ߞߙߏߝߏ ߟߎ߫ ߞߊ߲߬߸ ߊ߬ ߣߌ߫ ߡߊ߬ߓߊ߰ߓߊ߰ߟߌ ߟߎ߬߸ ߊ߬ ߣߌ߫ ߡߐ߰ ߟߊ߬ߢߌ߬ߣߌ߲߬ߠߊ߫ ߡߐ߰ ߘߊ߬ߞߘߐ߬ߓߐ߬ߟߊ ߟߎ߬ ߟߊߘߊ߲ ߊ߬ߟߎ߬ ߓߟߏ߫߸ ߞߵߏ߬ ߟߊ߫ ߞߙߎߞߊ ߛߍ߬ߘߏ߲߬ߠߊ ߟߎ߬ ߘߐߛߌߟߊ߲߫ ߓߊ߲ߓߊߟߌ ߞߊ߲߬.
ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߟߊ߫ ߗߋߛߓߍ ߣߌ߲߬ ߘߐ߫߸ ߊ߬ ߞߵߊ߬ ߟߊ߫ ߞߙߎߞߊߘߋ߲ ߠߎ߬ ߞߟߌ߫ ߖߊ߲߬ߕߏߒߖߘߍ߬ߘߐ ߟߋ߬ ߡߊ߬߸ ߊ߬ ߣߌ߫ ߝߊ߲ߡߊߖߌ߮، ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ߟߎ߬ ߦߴߊ߬ߟߎ߬ ߞߊߘߊ߲߫ ߞߵߊ߬ߟߎ߫ ߛߌ߲߬ߝߏ߲߬ߧߊ߫ ߘߌ߲߬ߞߌߙߊ ߟߎ߬ ߘߐ߫ ߊ߬ ߢߊ ߡߊ߬، ߞߏ߫ ߊ߬ߟߎ߬ ߦߴߊ߬ߟߎ߬ ߞߊߘߊ߲߫ ߞߊ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲߬ ߟߊߘߍ ߟߎ߫ ߝߊ߲߬ߞߊߘߏ߲߬߸ ߖߐ߲߰ߛߊ߫ ߖߊ߬ߡߊ ߞߊߣߊ߬ ߡߊߥߙߍߥߙߍ߫߸ ߛߊ߫ ߓߍ߯ ߓߌߣߍ߲ ߘߌ߫ ߕߏ߫ ߞߊ߬ ߖߡߊ߬ߕߌ߰ߦߊ ߕߏ߫ ߊ߬ ߡߊ߬.
ߊ߬ ߟߊ߫ ߞߎߡߊ߫ ߟߊߓߊ߲ ߘߐ߫ ߛߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߡߐ߱ ߟߎ߬ ߦߋ߫ ߕߏ߫ ߊ߬ߟߎ߬ ߞߊ߲ߞߊ߲߬߸ ߞߵߊ߬ ߟߴߊ߬ߟߎ߫ ߞߎ߲߭ ߘߐ߫ ߞߏ߫ ߊ߬ߟߎ߫ ߣߊ߬ߕߐ߫ ߝߊ߲߬ߞߊ ߟߊ߫߸ ߏ߬ ߕߍ߫ ߞߏ߫ ߟߊߡߍ߲ߕߊ߫ ߘߌ߫ ߡߎ߬ߕߎ߲߬.
ߊߓߎߓߞߊߙ ߖߐ߲߬ߡߊߛߌߣߌ߲ߟߐ߲߫ ߞߊ߬ߟߐ ߓߟߏ߫
ߛߌߟߊߓߐߛߐ߯ߣߊ߫ ߞߐߦߌߘߊߓߊ߮ ߛߌ߯ߙߌ߲߫
